لاہور: ڈائمنڈ پینٹس اور رابسن انٹرنیشنل نے شاندار کھیل کا مظاہرہ کرتے ہوئے لاہور اسمارٹ سٹی پولو اِن پنک ٹورنامنٹ 2026 کے فائنل میں جگہ بنا لی۔ دونوں ٹیمیں اتوار کو لاہور پولو کلب میں ٹائٹل کے لیے مدمقابل ہوں گی۔
ہفتے کو کھیلے گئے سیمی فائنلز میں ڈائمنڈ پینٹس نے ڈی آئی این/ایف جی کو 6-8 سے شکست دی، جبکہ رابسن انٹرنیشنل نے چار گول کے خسارے سے شاندار واپسی کرتے ہوئے ایف جی/ڈی آئی این پولو کو سنسنی خیز مقابلے میں 8-7 سے ہرایا۔
راجہ جلال ارسلان کے چھ گول، ڈائمنڈ پینٹس فائنل میں
پہلے سیمی فائنل میں ڈائمنڈ پینٹس نے ڈی آئی این/ایف جی کے خلاف 6-8 سے کامیابی حاصل کی۔ راجہ جلال ارسلان نے شاندار کارکردگی دکھاتے ہوئے چھ گول اسکور کیے، جبکہ بلال حئی نے دو گول کرکے ٹیم کی فتح میں اہم کردار ادا کیا۔
اس کامیابی کے ساتھ ڈائمنڈ پینٹس نے فائنل میں اپنی جگہ یقینی بنالی، جہاں اب اس کا مقابلہ رابسن انٹرنیشنل سے ہوگا۔
رابسن انٹرنیشنل کی ڈرامائی واپسی، راجہ میکائیل سمیع کے آٹھ گول
دوسرے سیمی فائنل میں رابسن انٹرنیشنل نے چوتھے چکر میں چار گول کے خسارے سے واپسی کرتے ہوئے ایف جی/ڈی آئی این پولو کو 7-8 سے شکست دے دی۔
راجہ میکائیل سمیع اس مقابلے کے نمایاں کھلاڑی رہے، جنہوں نے رابسن انٹرنیشنل کے تمام آٹھ گول خود اسکور کیے اور اپنی ٹیم کو فائنل تک پہنچانے میں فیصلہ کن کردار ادا کیا۔
ایف جی/ڈی آئی این پولو کی جانب سے حمزہ معاذ خان نے تین گول کیے، جبکہ شیخ محمد رفاعے اور ایرانی کھلاڑی ساحر یاغوبی نے دو، دو گول اسکور کیے۔ تاہم، ان کی کوششیں ٹیم کو شکست سے نہ بچا سکیں۔
فائنل کے لیے شائقین کی نظریں
سیمی فائنلز دیکھنے کے لیے لاہور پولو کلب میں بڑی تعداد میں شائقین موجود تھے۔ کلب کے صدر آغا نجیب رضا، ایگزیکٹو کمیٹی کے ارکان، کلب سیکریٹری اور متعدد خاندانوں نے بھی مقابلوں میں شرکت کی۔
اب ڈائمنڈ پینٹس اور رابسن انٹرنیشنل اتوار کو فائنل میں آمنے سامنے ہوں گے، جہاں دونوں ٹیموں کی نظریں لاہور اسمارٹ سٹی پولو اِن پنک ٹورنامنٹ 2026 کی ٹرافی جیتنے پر ہوں گی۔
Leave a comment