Home Football پاکستان کی پہلی SAFF چیمپئن شپ فائنل تک رسائی کی امیدیں، سیمی فائنل میں بنگلہ دیش سے مقابلہ آج
Football

پاکستان کی پہلی SAFF چیمپئن شپ فائنل تک رسائی کی امیدیں، سیمی فائنل میں بنگلہ دیش سے مقابلہ آج

Share
Share

نولبرٹو سولانو کی زیرِ نگرانی قومی ٹیم کو پانچ اوورسیز کھلاڑیوں کی خدمات حاصل ہوں گی، پاکستان پہلی مرتبہ ٹورنامنٹ کے فائنل میں جگہ بنانے کے لیے میدان میں اترے گا

ڈھاکا: پاکستان فٹبال ٹیم ہفتہ 14 نومبر کو SAFF چیمپئن شپ کے سیمی فائنل میں میزبان بنگلہ دیش کے مدمقابل ہوگی، جہاں قومی ٹیم کی نظریں پہلی مرتبہ ٹورنامنٹ کے فائنل میں رسائی پر مرکوز ہوں گی۔ دونوں ٹیموں کے درمیان مقابلہ ڈھاکا کے نیشنل اسٹیڈیم میں کھیلا جائے گا۔

پاکستانی ٹیم کے ہیڈ کوچ نولبرٹو سولانو کو اہم ناک آؤٹ میچ کے لیے پانچ اوورسیز کھلاڑیوں کی خدمات حاصل ہوں گی، جن کی شمولیت سے قومی اسکواڈ مزید مضبوط ہو گیا ہے۔ عبداللہ اقبال، عیسیٰ سلیمان، علی اکبر خان، عادل نبی اور عبدالصمد شہزاد گروپ مرحلے کے میچز میں شرکت نہ کرنے کے بعد ٹیم میں شامل ہو گئے ہیں۔ گروپ مرحلے کے مقابلے فیفا انٹرنیشنل ونڈو سے باہر کھیلے گئے تھے۔

پاکستان نے گروپ بی میں دو میچز سے تین پوائنٹس حاصل کرکے دوسری پوزیشن پر سیمی فائنل کے لیے کوالیفائی کیا۔ قومی ٹیم نے گروپ مرحلے میں پانچ گول اسکور کیے جبکہ اس کے خلاف تین گول ہوئے۔

پاکستان نے ایونٹ کا آغاز بھارت کے خلاف 2-3 کی شکست سے کیا، تاہم دوسرے میچ میں مالدیپ کو 0-3 سے شکست دے کر کم بیک کیا۔ اس مقابلے میں 19 سالہ نوجوان فارورڈ نجیب اللہ خان نے پہلے ہاف میں دو گول اسکور کرکے پاکستان کی کامیابی میں اہم کردار ادا کیا۔

پاکستان کی سیمی فائنل میں جگہ بھارت کی جانب سے مالدیپ کو 0-1 سے شکست دینے کے بعد یقینی ہوئی۔ بھارتی کھلاڑی سہیل احمد بھٹ نے 38ویں منٹ میں پنالٹی پر فیصلہ کن گول کیا۔ بھارت چھ پوائنٹس کے ساتھ گروپ میں سرفہرست رہا، جبکہ مالدیپ کوئی پوائنٹ حاصل نہ کر سکا۔

بنگلہ دیش کی ناقابلِ شکست پیش قدمی

میزبان بنگلہ دیش نے گروپ اے میں ناقابلِ شکست رہتے ہوئے سیمی فائنل تک رسائی حاصل کی۔ بنگلہ دیش نے اپنے پہلے میچ میں بھوٹان کو 0-1 سے ہرایا، جہاں متبادل کھلاڑی محمد ابراہیم نے فیصلہ کن گول کیا۔

میزبان ٹیم نے دوسرے میچ میں سری لنکا کو 0-4 سے شکست دے کر اپنی مضبوط تیاری کا ثبوت دیا۔ اس مقابلے میں شمیت شوم، حمزہ چوہدری، فرحان علی وحید اور رقیب حسین نے گول اسکور کیے۔

بنگلہ دیش کو ہوم گراؤنڈ اور شائقین کی بھرپور حمایت بھی حاصل ہوگی۔ میزبان ٹیم دوسری مرتبہ SAFF چیمپئن شپ کا ٹائٹل جیتنے کے لیے پرعزم ہے۔ اس نے اس سے قبل 2003 میں یہ اعزاز حاصل کیا تھا۔

پاکستان کے لیے یہ سیمی فائنل تاریخی اہمیت رکھتا ہے، کیونکہ کامیابی کی صورت میں قومی ٹیم پہلی مرتبہ ٹورنامنٹ کے فائنل میں جگہ بنائے گی۔

دوسرے سیمی فائنل میں دفاعی چیمپئن بھارت کا مقابلہ بھوٹان سے ہوگا، جبکہ ایونٹ کا فائنل 17 نومبر کو کھیلا جائے گا۔

Share

Leave a comment

Leave a Reply

Your email address will not be published. Required fields are marked *