پاکستان کے فاسٹ بولر ثاقب خان بائیں ہیمسٹرنگ میں کھنچاؤ کے باعث سری لنکا کے خلاف دوسرے ٹیسٹ میچ کے باقی حصے میں بولنگ سے باہر ہوگئے، جس سے سیریز جیتنے کی میزبان ٹیم کی امیدوں کو دھچکا لگا ہے۔
پاکستان کرکٹ بورڈ (پی سی بی) کے مطابق ثاقب خان ٹیم کے میڈیکل اسٹاف کی نگرانی میں علاج کروا رہے ہیں۔
ثاقب خان کو بدھ کے روز سری لنکا کی دوسری اننگز کے دوران اپنے دوسرے اوور میں انجری ہوئی۔ وہ اوپنر لاہیرو اڈارا کو آؤٹ کرنے کے بعد بائیں ہیمسٹرنگ میں تکلیف محسوس کرتے ہوئے میدان سے باہر چلے گئے۔
سیریز میں ثاقب خان کی شاندار کارکردگی
26 سالہ فاسٹ بولر جاری دو ٹیسٹ میچوں کی سیریز میں پاکستان کے نمایاں کھلاڑیوں میں شامل رہے ہیں۔
انہوں نے راولپنڈی کرکٹ اسٹیڈیم میں پہلے ٹیسٹ میں شاندار ڈیبیو کرتے ہوئے سری لنکا کی پہلی اننگز میں 130 رنز کے عوض 7 وکٹیں حاصل کیں۔ ان کی اہم وکٹوں میں سری لنکن کپتان کوشل مینڈس اور سنچری بنانے والے دھننجیا ڈی سلوا بھی شامل تھے۔
شاندار کارکردگی پر ثاقب خان کو پلیئر آف دی میچ قرار دیا گیا، تاہم پہلا ٹیسٹ ڈرا ہوگیا تھا۔
دوسرے ٹیسٹ میں بھی انہوں نے اپنی کارکردگی برقرار رکھتے ہوئے سری لنکا کی دوسری اننگز میں لاہیرو اڈارا کو 7 رنز پر آؤٹ کیا، لیکن اس کے بعد انجری کے باعث بولنگ جاری نہ رکھ سکے۔
پاکستان کی فتح کی کوششوں کو نقصان
پاکستان نے سری لنکا کو پہلی اننگز میں صرف 98 رنز پر آؤٹ کرکے 227 رنز کی بڑی برتری حاصل کی تھی۔ مہمان ٹیم دوسرے روز کھیل کے اختتام پر دوسری اننگز میں 74 رنز پر 3 وکٹیں گنوا چکی تھی اور اسے اننگز کی شکست سے بچنے کے لیے مزید 153 رنز درکار تھے۔
ثاقب خان کی عدم دستیابی پاکستان کے بولنگ اٹیک کے لیے اہم نقصان ہے، کیونکہ ٹیم میچ میں فتح حاصل کرکے سیریز جیتنے کی کوشش کر رہی ہے۔
پی سی بی نے تاحال ثاقب خان کی صحت یابی کے لیے کوئی حتمی مدت یا آئندہ میچوں میں ان کی دستیابی سے متعلق اعلان نہیں کیا۔
علی شبیر قائداعظم ٹرافی کے لیے اسکواڈ سے ریلیز
دوسری جانب فاسٹ بولر علی شبیر کو پاکستان ٹیسٹ اسکواڈ سے ریلیز کردیا گیا ہے تاکہ وہ 21 سے 24 نومبر تک لاہور بلوز کے خلاف بہاولپور ریجن کی جانب سے قائداعظم ٹرافی سلور میچ میں شرکت کرسکیں۔
بہاولپور کی مہم میں صرف دو راؤنڈ باقی ہونے کے باعث قومی سلیکٹرز چاہتے ہیں کہ علی شبیر باقی دونوں فرسٹ کلاس میچز کھیل کر ریڈ بال کرکٹ کا مزید تجربہ حاصل کریں۔
Leave a comment