Home Squash عالمی جونیئر اسکواش اسٹار ماہ نور علی کی وزیراعظم اور فیلڈ مارشل سے انصاف کی اپیل
Squash

عالمی جونیئر اسکواش اسٹار ماہ نور علی کی وزیراعظم اور فیلڈ مارشل سے انصاف کی اپیل

Share
Share

14 سالہ پاکستانی کھلاڑی کا دعویٰ ہے کہ ایشین جونیئر مقابلوں میں نمایاں کامیابیوں کے باوجود انہیں جائز انعامی رقم نہیں ملی، پاکستان اسپورٹس بورڈ کے متعدد دوروں کے باوجود مسئلہ حل نہ ہونے پر مالی معاونت کا مطالبہ کر دیا۔

پشاور سے تعلق رکھنے والی 14 سالہ انٹرنیشنل جونیئر اسکواش کھلاڑی ماہ نور علی نے وزیراعظم پاکستان اور فیلڈ مارشل سید عاصم منیر سے انصاف اور حکومتی سرپرستی کی اپیل کی ہے۔

علی سسٹرز میں شامل ماہ نور علی کا کہنا ہے کہ وہ بین الاقوامی سطح پر پاکستان کی نمائندگی کرتے ہوئے ملک کا نام روشن کرنے کی کوشش کر رہی ہیں، تاہم اپنی نمایاں کامیابیوں کے باوجود انہیں تاحال جائز انعامی رقم سے محروم رکھا گیا ہے۔

ایشین جونیئر مقابلوں میں چار گولڈ میڈلز

ماہ نور علی کے مطابق انہوں نے ایشین جونیئر سپر سیریز میں چار مرتبہ گولڈ میڈل حاصل کیا، جبکہ گزشتہ اور رواں سال دو مرتبہ ایشین جونیئر چیمپئن شپ کے فائنل تک رسائی حاصل کی۔

ان کا کہنا ہے کہ ان کامیابیوں کے باوجود انہیں اپنی واجب الادا انعامی رقم نہیں مل سکی۔

پاکستان اسپورٹس بورڈ کے متعدد چکر، مسئلہ برقرار

نوجوان کھلاڑی نے الزام عائد کیا کہ وہ اپنے معاملے کے حل کے لیے پاکستان اسپورٹس بورڈ اور اس کے صدر کے دفتر کے متعدد چکر لگا چکی ہیں، لیکن تاحال انہیں ان کا حق نہیں مل سکا۔

ماہ نور علی کے مطابق شدید مالی مشکلات کے باعث بین الاقوامی مقابلوں میں پاکستان کی نمائندگی جاری رکھنا مشکل ہوتا جا رہا ہے۔ بیرون ملک سفر، تربیت اور دیگر اخراجات برداشت کرنا ان کے لیے بڑا چیلنج بن چکا ہے۔

حکومتی معاونت اور انعامی رقم کی ادائیگی کا مطالبہ

ماہ نور علی نے وزیراعظم اور فیلڈ مارشل سے درخواست کی ہے کہ ان کی جائز انعامی رقم فوری ادا کرنے کے احکامات جاری کیے جائیں اور انہیں مالی معاونت فراہم کی جائے تاکہ وہ بین الاقوامی مقابلوں میں پاکستان کے لیے مزید تمغے جیت سکیں۔

ان کا کہنا ہے کہ اگر نوجوان کھلاڑیوں کو ان کی محنت کا صلہ اور حکومتی سرپرستی نہیں ملے گی تو مستقبل میں کون اس کھیل کو اپنائے گا اور عالمی سطح پر پاکستان کی نمائندگی کرے گا۔

ماہ نور علی نے کہا کہ وہ صرف اپنا حق اور پاکستان کی نمائندگی جاری رکھنے کے لیے تعاون چاہتی ہیں۔ انہوں نے متعلقہ حکام سے اپیل کی کہ نوجوان ٹیلنٹ کو ضائع ہونے سے بچانے کے لیے ان کی آواز سنی جائے اور مسئلے کا فوری حل نکالا جائے۔

Share

Leave a comment

Leave a Reply

Your email address will not be published. Required fields are marked *