آخری میچ میں 22 رنز سے کامیابی، پانچ میچز کی سیریز 1-3 سے بھارت کے نام، ارشدیپ سنگھ مین آف دی میچ قرار
بھارت نے پانچویں اور آخری ون ڈے انٹرنیشنل میں نیوزی لینڈ کو 22 رنز سے شکست دے کر پانچ میچز کی سیریز 1-3 سے اپنے نام کر لی۔ ماؤنٹ ماؤنگانائی اسٹیڈیم میں اتوار کو کھیلے گئے مقابلے میں بھارتی ٹیم نے پہلے بیٹنگ کرتے ہوئے 209 رنز بنائے، جس کے جواب میں میزبان نیوزی لینڈ کی پوری ٹیم 48 اوورز میں 187 رنز پر آؤٹ ہو گئی۔
بھارت کی جانب سے ارشدیپ سنگھ نے شاندار بولنگ کرتے ہوئے 30 رنز کے عوض 3 وکٹیں حاصل کیں اور انہیں میچ کا بہترین کھلاڑی قرار دیا گیا۔ سیریز میں 9 وکٹیں لینے والے گرنور برار کو سیریز کا بہترین کھلاڑی منتخب کیا گیا۔
یاد رہے کہ چوتھے ون ڈے میں نیوزی لینڈ نے بھارت کو 244 رنز سے شکست دی تھی، جو بھارتی ٹیم کی ون ڈے کرکٹ کی تاریخ کی دوسری بڑی شکست تھی۔ تاہم آخری میچ میں کامیابی کے ساتھ بھارت نے سیریز بھی اپنے نام کر لی۔
بھارت کی بیٹنگ مشکلات کا شکار
نیوزی لینڈ کے کپتان مچل سینٹنر نے ٹاس جیت کر پہلے فیلڈنگ کا فیصلہ کیا۔ بھارت کی جانب سے روہت شرما اور روتراج گائیکواڑ نے اننگز کا محتاط آغاز کیا اور پانچ اوورز میں 23 رنز بنائے، تاہم روہت شرما میتھیو فشر کی گیند پر کیچ آؤٹ ہو گئے۔
اس کے بعد ویرات کوہلی صرف 5 رنز بنا کر پویلین لوٹ گئے، جبکہ کپتان شریاس ائیر 22 رنز بنا سکے۔ نیوزی لینڈ کے فاسٹ بولرز نے بھارتی بیٹنگ لائن کو دباؤ میں رکھا اور کوئی بھی بلے باز بڑی اننگز کھیلنے میں کامیاب نہ ہو سکا۔
اکشر پٹیل اور وکٹ کیپر بیٹر ایشان کشن نے مزاحمت کرتے ہوئے 46، 46 رنز بنائے۔ نمن دھیر نے 22، روتراج گائیکواڑ نے 18 اور ارشدیپ سنگھ نے 14 رنز اسکور کیے۔ عاقب نبی 5 رنز بنا کر آؤٹ ہوئے، جبکہ محمد سراج 14 رنز کے ساتھ ناٹ آؤٹ رہے۔
نیوزی لینڈ کی جانب سے جیکب ڈفی اور مچل سینٹنر نے تین، تین وکٹیں حاصل کیں۔ میتھیو فشر نے دو جبکہ بلیئر ٹکنر اور مچل بریسویل نے ایک، ایک کھلاڑی کو آؤٹ کیا۔

نیوزی لینڈ کی بیٹنگ لائن 187 رنز پر ڈھیر
210 رنز کے ہدف کے تعاقب میں نیوزی لینڈ نے ابتدا میں بہتر کھیل پیش کیا اور 16 اوورز میں دو وکٹوں کے نقصان پر 64 رنز بنا لیے تھے۔ اوپنرز ٹم سیفرٹ 14 اور ول ینگ 22 رنز بنا کر آؤٹ ہوئے۔
نک کیلی نے 24 رنز بنائے، تاہم ٹیم کے مجموعی اسکور 82 رنز پر ان کی وکٹ گرنے کے بعد نیوزی لینڈ کی بیٹنگ لائن لڑکھڑا گئی۔
فن ایلن ایک، مچل بریسویل 19، ڈین فوکس کروفٹ 31، کپتان مچل سینٹنر 24، کرسٹن کلارک 16، بلیئر ٹکنر 14 اور جیکب ڈفی 9 رنز بنا کر آؤٹ ہوئے۔ یوں نیوزی لینڈ کی پوری ٹیم 48 اوورز میں 187 رنز پر پویلین لوٹ گئی۔
بھارت کی جانب سے ارشدیپ سنگھ نے تین وکٹیں حاصل کیں، جبکہ محمد سراج اور اکشر پٹیل نے دو، دو کھلاڑیوں کو آؤٹ کیا۔ یش ٹھاکر، نمن دھیر اور عاقب نبی نے ایک، ایک وکٹ حاصل کی۔
نیوزی لینڈ کے دورے میں بھارت کی دوسری سیریز فتح
بھارت نے اس دورے کے دوران پانچ میچز کی ٹی20 سیریز بھی 1-4 سے اپنے نام کی تھی، جبکہ اب ون ڈے سیریز میں بھی 1-3 سے کامیابی حاصل کر لی ہے۔
دونوں ٹیموں کے درمیان دو ٹیسٹ میچز پر مشتمل سیریز کا آغاز 19 نومبر سے ویلنگٹن میں ہوگا۔
Leave a comment