پاکستان نے پہلے بیٹنگ کرتے ہوئے 275 رنز بنائے، جواب میں نیپال کی ٹیم 174 رنز پر ڈھیر ہوگئی۔ احمد حسین نے 89 رنز بنانے کے ساتھ چار وکٹیں بھی حاصل کیں اور میچ کے بہترین کھلاڑی قرار پائے۔
المیرات، 10 نومبر 2026: اے سی سی انڈر 19 ایشیا کپ میں دفاعی چیمپئن پاکستان نے شاندار کھیل کا مظاہرہ کرتے ہوئے نیپال کو 101 رنز سے شکست دے دی۔ پاکستان کے 276 رنز کے ہدف کے تعاقب میں نیپال کی پوری ٹیم 43.4 اوورز میں 174 رنز بنا کر آؤٹ ہوگئی۔
عمان کے الامیرات کرکٹ اسٹیڈیم میں کھیلے گئے گروپ اے کے میچ میں نیپال نے ٹاس جیت کر پہلے فیلڈنگ کا فیصلہ کیا۔ پاکستان نے مقررہ 50 اوورز میں سات وکٹوں کے نقصان پر 275 رنز بنائے۔
احمد حسین اور فرحان یوسف کی شاندار بیٹنگ
پاکستان کی اننگز کا آغاز عثمان خان اور جہانگیر بلال نے کیا۔ دونوں نے بالترتیب 19 اور 22 رنز بنائے، تاہم پاکستان کی ابتدائی وکٹیں جلد گرنے کے بعد کپتان فرحان یوسف اور احمد حسین نے ذمہ دارانہ بیٹنگ کرتے ہوئے اننگز کو سنبھالا۔
فرحان یوسف نے 74 رنز کی عمدہ اننگز کھیلی، جبکہ احمد حسین نے 89 رنز بنا کر نمایاں کارکردگی دکھائی۔ ان کی اننگز نے پاکستان کو مضبوط مجموعے تک پہنچانے میں اہم کردار ادا کیا۔
حسنین عباس ڈار نے 25 رنز بنائے، جبکہ حمزہ ظہور 11 رنز کے ساتھ آؤٹ ہوئے۔ محمد صیام 2 اور رضوان اللہ 5 رنز بنا کر ناٹ آؤٹ رہے۔
نیپال کی جانب سے بپن شرما نے تین وکٹیں حاصل کیں، سوشل راول نے دو جبکہ ابھے یادیو اور سچن بھٹ نے ایک، ایک کھلاڑی کو آؤٹ کیا۔
احمد حسین کی بولنگ، نیپال کی بیٹنگ مشکلات کا شکار
276 رنز کے ہدف کے تعاقب میں نیپال کی جانب سے نیرج کمار یادیو اور سہیل کنور نے اننگز کا آغاز کیا، تاہم پاکستانی بولرز نے وقفے وقفے سے وکٹیں حاصل کرکے حریف ٹیم کو دباؤ میں رکھا۔
سہیل کنور 14 رنز بنا کر احمد حسین کی گیند پر ایل بی ڈبلیو ہوئے، جبکہ نیرج کمار یادیو 29 رنز بنا کر اسٹمپ آؤٹ ہوگئے۔
سوریانشو کوئرالہ نے 22 اور درش سونار نے 20 رنز بنائے۔ روہت چاند 37 رنز کے ساتھ نیپال کے نمایاں بیٹر رہے، تاہم وہ بھی ٹیم کو شکست سے نہ بچا سکے۔
نیپال کی دیگر وکٹیں بھی یکے بعد دیگرے گرتی رہیں۔ اشیش نے 6، سچن بھٹ نے صفر، روشان شاہی نے 7 اور ابھے یادیو نے 23 رنز بنائے۔ سوشل راول بھی بغیر کوئی رن بنائے آؤٹ ہوئے، جبکہ بپن شرما ایک رن کے ساتھ ناٹ آؤٹ رہے۔
پاکستان کی جانب سے احمد حسین نے چار وکٹیں حاصل کرکے بولنگ میں بھی اپنی صلاحیتوں کا بھرپور مظاہرہ کیا۔ محمد صیام اور محمد حذیفہ نے دو، دو جبکہ رضوان اللہ اور جہانگیر بلال نے ایک، ایک وکٹ حاصل کی۔
پاکستان کی سیمی فائنل میں رسائی
شاندار آل راؤنڈ کارکردگی پر احمد حسین کو میچ کا بہترین کھلاڑی قرار دیا گیا۔ اس کامیابی کے ساتھ پاکستان نے ایونٹ میں مسلسل تیسری فتح حاصل کرلی۔
پاکستان ابتدائی دو میچز جیت کر پہلے ہی سیمی فائنل میں جگہ بنا چکا تھا۔ گروپ اے کے دوسرے سیمی فائنلسٹ کا فیصلہ بھارت اور متحدہ عرب امارات کے درمیان میچ کے نتیجے سے ہونا تھا، جبکہ گروپ بی سے افغانستان اور سری لنکا سیمی فائنل کے لیے کوالیفائی کر چکے تھے۔
Leave a comment