کراچی: پاکستان کے سابق ٹیسٹ اوپنر صادق محمد نے اسٹار بیٹر بابر اعظم کی بیٹنگ میں تکنیکی خامیوں کی نشاندہی کرتے ہوئے مشورہ دیا ہے کہ وہ اپنی شاٹ سلیکشن، فٹ ورک اور بیٹنگ اسٹانس میں معمولی تبدیلیاں کرکے دوبارہ بہترین فارم حاصل کرسکتے ہیں۔
صادق محمد کے مطابق بابر اعظم اکثر گیند کے قریب آنے سے پہلے شاٹ کھیلنے کی کوشش کرتے ہیں اور ان کا بیٹ جسم سے دور ہوتا ہے، جس کے باعث آف اسٹمپ سے باہر جانے والی گیندوں پر وہ مشکل میں پڑ جاتے ہیں۔
بیٹنگ اسٹانس اور فٹ ورک میں تبدیلی کی تجویز
سابق ٹیسٹ اوپنر نے بابر کے بیٹنگ اسٹانس پر بھی سوال اٹھاتے ہوئے کہا کہ ان کے پچھلے پاؤں کی پوزیشن آف اسٹمپ کی لائن میں ہونے سے گیند کی چوڑائی کا درست اندازہ لگانا مشکل ہوسکتا ہے۔ اس کا فائدہ اٹھاتے ہوئے حریف بولرز آف اسٹمپ سے باہر سوئنگ ہوتی گیندوں پر انہیں پریشان کرسکتے ہیں۔
صادق محمد نے تجویز دی کہ بابر بولر کے گیند پھینکنے سے پہلے اپنے گارڈ اور پچھلے پاؤں کی پوزیشن میں تبدیلی کریں اور اسے لیگ و مڈل اسٹمپ کے قریب رکھیں۔ ان کے خیال میں اس تبدیلی سے بولرز کو آف اسٹمپ سے باہر کی بجائے وکٹوں کو نشانہ بنانے پر مجبور کیا جاسکتا ہے۔
انہوں نے مزید کہا کہ بابر اکثر گیند کو اپنے جسم سے دور کھیلتے ہیں، جس کی وجہ سے آف سائیڈ پر کھیلے گئے شاٹس سلپ، گلی اور بیک ورڈ پوائنٹ کی جانب چلے جاتے ہیں۔
صادق کے مطابق گیند کو اگلے پاؤں کے قریب کھیلنے سے بیٹ کا رخ بہتر رکھنے میں مدد مل سکتی ہے اور گیند کے ہوا میں پیچھے کی جانب جانے کا خطرہ کم ہوسکتا ہے۔
نیٹ پریکٹس سے بہتری ممکن
صادق محمد نے نشاندہی کی کہ ڈرائیو کھیلتے ہوئے بابر اپنے جسم کا وزن اگلے پاؤں پر پوری طرح منتقل نہیں کر پاتے، جس سے کورز کے درمیان اور اسکوائر کے سامنے گیند کو مؤثر انداز میں کھیلنے کی صلاحیت متاثر ہوتی ہے۔
انہوں نے زور دیا کہ بابر کو گیند پر آخری لمحے تک نظر رکھنے اور فرنٹ فٹ و بیک فٹ دونوں طرح کے شاٹس کھیلتے ہوئے جسمانی توازن برقرار رکھنے پر توجہ دینی چاہیے۔
ان کے مطابق اسٹانس، پاؤں کی پوزیشن اور ٹائمنگ پر مرکوز باقاعدہ نیٹ پریکٹس سے بابر اپنے دفاعی اور جارحانہ شاٹس کو زیادہ مؤثر بنا سکتے ہیں۔
اپنے تجربے کی مثال بھی دے دی
صادق محمد نے اپنے کاؤنٹی کرکٹ کے دور کا حوالہ دیتے ہوئے بتایا کہ انہیں بھی اسی نوعیت کے مسائل کا سامنا رہا تھا۔ تاہم، اپنے بھائی وزیر محمد کے مشورے پر تکنیک میں تبدیلیاں کرنے کے بعد انہوں نے واروکشائر کے خلاف اگلی اننگز میں سنچری اسکور کی۔
انہوں نے اس اعتماد کا اظہار کیا کہ بابر اعظم اب بھی اعلیٰ معیار کے بیٹر ہیں اور تکنیک میں چند بنیادی اصلاحات کے ذریعے اپنی سابقہ فارم حاصل کرسکتے ہیں۔
دوسری جانب پاکستان کے سابق کپتان محمد یوسف بھی حال ہی میں بابر کو بیٹنگ کی خامیوں پر قابو پانے کے لیے انگلینڈ یا آسٹریلیا میں وقت گزارنے اور خصوصی کوچنگ حاصل کرنے کا مشورہ دے چکے ہیں۔
Leave a comment