کیپ ٹاؤن: جنوبی افریقہ نے تیسرے اور آخری ٹیسٹ میں آسٹریلیا کو 176 رنز سے شکست دے کر تین میچوں کی سیریز 2-1 سے اپنے نام کرلی۔ نیولینڈز میں کھیلے گئے فیصلہ کن مقابلے میں اسپنر سائمن ہارمر نے دوسری اننگز میں 6 وکٹیں حاصل کرکے میچ میں مجموعی طور پر 10 شکار مکمل کیے۔
جنوبی افریقہ کی جانب سے دیے گئے 288 رنز کے ہدف کے تعاقب میں آسٹریلوی ٹیم پانچویں روز صرف 111 رنز پر ڈھیر ہوگئی۔ ہارمر نے 21.1 اوورز میں محض 16 رنز دے کر 6 وکٹیں حاصل کیں، جبکہ فاسٹ بولر کگیسو ربادا نے ابتدائی اوورز میں اہم وکٹیں لے کر حریف ٹیم کو شدید دباؤ میں ڈال دیا۔
ربادا کے ابتدائی وار، آسٹریلیا مشکلات کا شکار
آخری روز آسٹریلیا کی اننگز کا آغاز انتہائی مایوس کن رہا۔ ربادا نے پہلے ہی اوور میں میٹ رینشا اور مارنس لبوشین کو آؤٹ کرکے مہمان ٹیم کی مشکلات بڑھا دیں۔ رینشا پہلی ہی گیند پر بغیر کوئی رن بنائے پویلین لوٹ گئے، جبکہ لبوشین بھی صرف 4 رنز بنا سکے۔
بعدازاں ٹریوس ہیڈ 14 رنز بنا کر آؤٹ ہوئے، جس سے آسٹریلیا کی بیٹنگ لائن مزید دباؤ میں آگئی۔ ربادا نے مجموعی طور پر 3 وکٹیں حاصل کیں اور ٹیسٹ کرکٹ میں اپنے 350 شکار بھی مکمل کیے۔
ہارمر کی اسپن کا جادو، آسٹریلیا کے 8 کھلاڑی 62 رنز پر آؤٹ
ربادا کے ابتدائی حملوں کے بعد سائمن ہارمر نے آسٹریلوی بیٹنگ کو تہس نہس کردیا۔ انہوں نے مختصر وقفے میں وکٹیں حاصل کرکے مہمان ٹیم کو 42 رنز پر 6 وکٹوں کے نقصان سے دوچار کردیا۔
مچل اسٹارک بھی ہارمر کا شکار بنے، جبکہ کیمرون گرین نے 110 گیندوں پر 27 رنز بنا کر کچھ مزاحمت کی، لیکن وہ بھی اپنی ٹیم کو شکست سے نہ بچا سکے۔
ایک موقع پر آسٹریلیا کے 8 کھلاڑی صرف 62 رنز پر آؤٹ ہوچکے تھے اور جنوبی افریقہ کی فتح یقینی دکھائی دے رہی تھی۔
نیتھن لیون کی مزاحمت بھی کام نہ آئی
آسٹریلوی کپتان پیٹ کمنز اور نیتھن لیون نے نویں وکٹ کے لیے 45 رنز کی مزاحمتی شراکت قائم کرکے جنوبی افریقی بولرز کو کچھ دیر روکے رکھا۔
کمنز نے 90 گیندوں پر 11 رنز بنائے، جبکہ لیون 57 گیندوں پر 33 رنز کے ساتھ نمایاں رہے اور ناٹ آؤٹ پویلین واپس گئے۔ تاہم ہارمر نے پہلے کمنز کو آؤٹ کیا اور پھر جوش ہیزل ووڈ کو بولڈ کرکے آسٹریلیا کی اننگز 111 رنز پر ختم کردی۔
جنوبی افریقہ کی شاندار واپسی
اس کامیابی کے ساتھ جنوبی افریقہ نے سیریز 2-1 سے جیت لی۔ سائمن ہارمر کو میچ میں مجموعی طور پر 10 وکٹیں حاصل کرنے پر پلیئر آف دی میچ قرار دیا گیا، جبکہ مارکو یانسن سیریز کے بہترین کھلاڑی رہے۔
جنوبی افریقہ کی یہ فتح اس لیے بھی اہم رہی کہ ٹیم نے پہلے ٹیسٹ میں شکست کے بعد شاندار واپسی کرتے ہوئے اگلے دونوں میچ جیت کر سیریز اپنے نام کی۔
Leave a comment